ياااااااه الموضوع ليس سهلا كما كنت أتوقع

اكتب بالعامية لجل الناس ما تقرالى ولا بالفصحى التى اعشقها بجنون؟

المشكلة ليست فى كيفية الكتابة ولكن فى "ماذا اكتب؟" - رغى ولا فضفضة ولا حاجة تفيد أى حد ممكن يقراها؟

من أولها كدة صعبة

 كنت باحب مواضيع التعبير أوى وانا صغير ولما زار السادات القدس كنت فى سنة رابعة ابتدائى

أى موضوع تعبير يجى فى امتحان كنت أدش اربع خمس صفحات ولازم غصب عن عين موضوع التعبير نفسه اتكلم عن الخيانة والعمالة والاستسلام والتفريط والضياع والهزيمة - حتى لو كان الموضوع "اكتب عن اجمل المواقع السياحية فى محافظة الجيزة" أى والله

كان كله بيشتم وبس - فى مقابل إعلام بيمدح وخلاص - الأب والخال والجار والبقال والمدرس فى الفصل وسواق الميكروباس

افتكرت مواضيع التعبير دى لما البنت اللى كتبت موضوع فى امتحان السنة اللى فاتت والمصحح "المصحصح" جرى بورقة الإجابة على الجهات العليا وسقطوا البنت وحرموها من الدراسة - لولا تدخل رئيس الجمهورية !!!!! افتكرت أمى الله يرحمها لما كانت تسألنى بعد كل امتحان كتبت إيه يا عدل فى موضوع التعبير - وعيطت لما اخدت الابتدائية من غير ما اطلع من الاوائل على المحافظة (هما نقصوك الخمس درجات دول عشان الكلام اللى انت كاتبه) مع انى كنت واخد 100 من 100 فى العربى ونقصت فى الجغرافيا

كان ايامها الاوائل على المحافظة بيطلعوا مع مذيعة اسمها امانى ناشد فى برنامج اسمه "الكاميرا 9" وكان حلمى اطلع فى البرنامج ده لدرجة انى فكرت اعيد الابتدائية عشان الخمس درجات اللى ضاعوا منى دول - لكن رحمة ربنا سبقت وأمانى ناشد ماتت فى نفس السنة

ودخلت إعدادى ويوم مقتل السادات عيطت بالرغم من كل اللى كنت باسمعه واردده ايامها زى البغبغان

وقبل كام يوم من مؤتمر انابوليس - وبعد 30 سنة من مبادرة السادات - لسة لحد النهاردة محتار ومش عارف مين مع مين؟

يا ترى الراجل ده كان غلط وهو السبب فى كل اللى حصل وبيحصل وحيحصل فى مصر والسودان وفلسطين والعراق ولبنان والمنطقة كلها؟

ولا فعلا كان عبقرى وسبق كل اللى حواليه وحرم العدو من توطين ملايين المهاجرين فى سيناء من يهود الاتحاد السوفيتى الغير مأسوف عليه؟

طب لو كان خاين وعميل طب الباقيين كانوا فين وبلادهم بتتقطع قدام عينيهم حتة حتة وبالتصوير البطىء

طب لو كان عبقرى وسابق عصره وأوانه صحيح هل احنا نقدر نحمى أو نحافظ على اللى قدر يعمله "استعادة سيناء حتى ولو بسيادة منقوصة ولكن دون مستعمرين أو مستعمرات صهيونية سرطانية التوسع" طب إزاى؟ إذا كان عددهم بيزيد وقوتهم بتزيد وحاجتهم للأرض والماء قطعا بتزيد.

كان لازم سينا تضيع عشان نفكر فى سينا وبس؟ كان لازم القناة تتعطل فيها الملاحة عقابا على تأميمها فى 56؟ وكان لازم الملاحة ترجع فيها من تانى عشان النمو الصناعى والاقتصادى العالمى الضخم؟

يعنى كان لازم ننهزم وننتصر !! طب ليه أممنا القناة؟ وليه عملنا معاهدة سلام؟ طب ليه دخلنا الحرب من أساسه؟

عشان فلسطين - طب ليه فلسطين ضاعت؟ عشان العروبة - طب عشان خاطرى ما تتفرجش على ميلودى تيونز؟ عشان القدس - طب وبقية المساجد اللى من المحيط للخليج محتاجة اللى يفك أسرها؟ ولا عشان اللاجئين - هو صحيح اللاجئين راحوا فين وما حدش سامعلهم صوت خالص ليه؟

طيب: لو الناس زمان غلطوا أو ارتكبوا اخطاء تكتيكية ولا استراتيجية ولا أى مهلبية - إيه بقى اللى نقدر نعمله النهاردة عشان نتفادى المصايب اللى جاية واللى اكيد لو احنا ما شفنهاش اللى جاى بعد منا حيشوفها؟

نسلم ولا ما نسلمش - نسلم ولا ما نسلمش - نسلم ولا ما نسلمش - نسلم ولا ما نسلمش - نسلم ولا ما نسلمش

غلب حمارى